أعلن الفنان الكوميدى أكرم حسنى، عن تعاونه مع المخرج الكبير شريف عرفة فى فيلم سينمائى جديد لعرضه العام المقبل 2020.
وروى حسنى قصة تأثره بالمخرج شريف عرفة منذ أن كان طالبا فى كلية الشرطة، وقال: "أولى كلية الشرطة وكان فى فترة التدريب الاساسى ( 45 يوم مابنخرجش من الكلية ) مخصصين يوم فى الاسبوع بعد انتهاء زيارة الاهالى للطلبة لمشاهدة فيلم سينمائى فى احد مدرجات الكلية للترفيه عن الطلبة، وطبعا ده كان جايلى عالطبطاب لانى بحب السينما من صغرى.. اول يوم عرض كان فيلم " الارهاب والكباب " اخراج الاستاذ الكبير / شريف عرفه".
وأضاف حسنى عبر حسابه الشخصى على إنستجرام: "عمرى ما هانسى الخطفة اللى اتخطفتها يومها من الفيلم وتأثيره عليا وازاى قدر الاستاذ شريف كمخرج عبقرى انه يوصل لى الاحساس ده والانبهار ده بكل عناصر الفيلم ومن وقتها بدأت اركز مع السينما واتناولها بمفهوم تانى، وطبعا كان من رابع المستحيلات وقتها انى اتخيل اى شئ ممكن يربطنى بهذا المخرج العبقرى (اصل ايه اللى هايربط ظابط بمخرج غير انى اشوفه فى لجنة أو كمين واعبرله عن اعجابى بيه".
واختتم أكرم حسنى حديثه معلنا عن تعاونه مع المخرج الكبير فى فيلم سينمائى قائلا: "النهاردة بعد مرور ٢٧ سنة من الحكاية دى وبعد مشوار طويل من التحديات والمجهود احب ابلغكم وانا كلى شرف وفخر انى وقعت فيلم من اخراج الاستاذ الكبير / شريف عرفه لسنة ٢٠٢٠.. دعواتكم انى اكون قد المسئولية".
