فاجأ المطرب هيثم شاكر جمهوره منذ يومين بأن سبب غيابه لمدة 5 سنوات عن الساحة الغنائية، بأنه أصيب بمرض خبيث ولم يفصح عن أى تفاصيل، ولكن تواصل اليوم السابع والذى كشف بأنه أصيب بورم خبيث فى المعدة والقولون وتم استئصال جزء كبير من المعدة فى لندن وهو ما أدى إلى إنخفاض وزنه بشكل كبير.
ونشرت شذى صورة تجمعها مع صديقها المطرب هيثم شاكر وعلقت قائلة، "من امبارح بيجيلي تليفونات اللي زعلانين مني علشان انا من اصحاب هيثم القريبين و كنت عارفه و مقولتش على مرضه و اللي اصلا بيشكك ان هيثم كان تعبان.
وتابعت: عموما علشان مش هينفع ارد على كل المكالمات، هيثم كان فعلا مريض بمرض خطير ربنا يبعد كل شر عن اي حد يا رب و الحمدلله هو تعافى بس هو لسه في حاجات كتير محروم منها و أهمها حاجه أساسيه لأي كائن حي و هي نعمه الأكل لحد دلوقتي وهيفضل كده ميقدرش ياكل بشكل طبيعي و ده سبب اختفاءه كل الفتره دي وده سبب ان هو فقد كتير جدا من وزنه
وأضافت: محدش بيسيب نجاحه بمزاجه و يختفي ومش معنى ان اي حد بينزل صور و لا بيبين انه مبسوط ان دي بتكون الحقيقه كل واحد عندوا حته مستخبيه محدش عارف عنها حاجه ، وانا كتبت كده علشان محدش يلومني ليه مكنتش بقول، ولكن هيثم هو اللي مكنش حابب حد يعرف حاجه عن كل معاناته دي علشان اصحاب النفوس المريضه ميفهموش ان هو بيعمل اي حوارات علشان يبرر بيها غيابه.
واختتمت حديثها: لما قرر يعرف جمهوره و اصحابه عرفهم و هو منور و فرحان بنجاح ألبومه اللي في وسط كل ده كان مهتم برضوا مينزلش بأي حاجه و كان عندوا اصرار يعمل البوم محترم، مبروووك يا هيثوم و حمدلله على سلامتك، و افرح بتعبك في ألبومك و بالناس اللي بتحبك.
وطرح هيثم شاكر منذ عدة أيام ألبومه الجديد "معرفة قديمة" والذى يضم 12 أغنية هى"ماتوصونيش" كلما أيمن بهجت قمر وألحان عمر ومصطفى وتوزيع شريف مكاوى، "لحقتينى" كلمات نادر عبد الله وألحان محمد يحيى وتوزيع أحمد إبراهيم، "يا حبيبة" كلمات أمير طعيمة وألحان عمر ومصطفى وتوزيع شريف مكاوى، "إحنا افترقنا" كلمات رمضان محمد وألحان شادى حسن وتوزيع أحمد وجيه، و"مش مهم أنا" كلمات محمد رفاعى وألحان وليد سعد وتوزيع أحمد إبراهيم.