أكد الشاعر والكاتب أيمن بهجت قمر أن التواصل مع الجمهور عبر شبكات التواصل الاجتماعي أصبح له أضرار ومشاكل كبيرة، شارحًا في تدوينة عبر حسابه الشخصي بـ"فيس بوك" بعض من هذه المشاكل.
وقال قمر في تدوينته: "ساعات بتأكد أن التواصل مع الجمهور بعد ظهور الفيس بوك وما شابه ذلك بقى سبب لمشاكل كتيرة انك مثلا تلاقي معجب متطرف بفنان انت مختلف معاه يقحم نفسه في مشكله مالهاش علاقة بالفن اللي بيتلقاه وييجي يعين نفسه محامي عن الفنان وكمان يضغط عليك نفسيا أو يشتمك وأنت طبعا مش متعود أن حد يشتمك فيطلع منك رد فعل عنيف يوسع الفجوة اللي بينك وبين الفنان اللي هو أساسا صاحبك أنت مش صاحب المعجب"
وأضاف: "ولو أنت كتبت بوست في لحظة غضب لأنك بشر وبني آدم عادي بدون أكونتات مضروبة ولجان ودراويش وجيت مسحت البوست وتراجعت تلاقي المتطرف ده مصوره ومشيره وموافق إنه يتعدى على خصوصيتك لأنك مدام مسحته تبقى مش موافق أن حد ياخده أو تراجعت عنه إيه المشكلة مش فاهم ! احنا مش واقفين لبعض بالسكاكين وإلا كلنا قاعدين عشان نفرش لبعض الملايات ونجرس بعض خصوصا إنك بقيت طرف ضد واحد ماعملكش إنت حاجة شخصية عشان تدافع عن نفسك ولا أكل حقك أو صهين عليه مثلا.. مادام البوست اتمسح يبقى فيه رحمة وتسامح".
وتابع: "سيبوا الناس في حالها وماتشتغلوش محامين لناس لو قابلتوهم في حتة مش هيعرفوكوا أساسا والمتعة اللي انتوا المفروض تستنوها من المطرب هي الأغنيه اللي بيقدمها يعني مصلحتك أن اللي بتسمعه وبتستمتع بيه تحافظ عليه وتحافظ إنه يستمر، يا فرحتك انت لما تهمك مشاكل المطرب والملحن والشاعر قبل أغانيهم .. حضرتك استفدت إيه، هو أنت مستمع والا صحفي ؟".
وختم: "وبعدين مافيش حاجة اسمها المطرب هو الأهم ده تعبير خطأ لأنه من غير صناع محترمين هيبقى ولا حاجة وهيبتدي يهتم بحاجات تانية عشان يكمل اللي ناقص في الفن اللي بيقدمه، لو كل واحد يخليه في حاله ...كلنا هنرتاح ..وهننبسط كمان".
