بعد 7 سنين من عرضه أسدل الستار على "مسرح مصر"، وقدم أشرف عبد الباقى من خلاله مجموعة كبيرة من الفنانين الجدد، الذين أصبحوا نجوما حاليا، وحرص نجوم مسرح مصر توديعه بكلمات حزينة ومؤثرة، موجهين الشكر لقائدهم أشرف عبد الباقى على وقوفه بجانبهم طوال 7 سنوات، كما عبر الجمهور عن حزنهم الشديد لختام مسرح مصر.
فى البداية قال النجم أشرف عبد الباقى، "بنشكر جمهورنا الجميل اللى وقف معانا على مدار 7 سنين و انبسط معانا فى 130 مسرحية، بشكر شباب مسرح مصر اللي بقوا نجوم و احترامهم و تفضيلهم للمسرح بنشكر كل واحد داخل و خارج الكواليس و تعب معانا عشان نوصل للاحنا فيه بنحبكم إلي اللقاء في أعمال قريبة إن شاء الله ختام مسرح مصر".
وكتب الفنان مصطفى خاطر، قائلا:" والله العظيم انا مش عارف اقول ايه المشاعر جوايا كتيره قوي فرحه كبيره بالنجاح وحزن شديد بحنين غريب انا مش عارف بقول ايه المشاعر اللي جوايا مش لاقيلها كلام اكتبو بس بشكر الجمهور اللي وقف في ظهرنا علي مدار 7 سنين بشكر الاستاذ اشرف عبد الباقي اللي وثق فينا وادنا فرصه كبيره زي دي وعلمنا كتير قوي وصبر علينا واحتوانا كأب واخ كبير بشكر كل القائمين علي المشروع من اصغر عامل لاكبر حد ساهم معانا في التجربه بشكر عم حسن نجيب مدير الفرقه الخبره الكبيره والحب اللي زرعو فينا بشكر الاستاذ نادر صلاح الدين المخرج والمؤلف للمشروع وصاحب مجهود كبير وخبره كبيره ادهالنا واخيرا بشكر كل زمايلي الممثلين في الفرقه وبقولكم انا بحبكم جدا جدا ونعم الاخوات والصحاب وان شاء الله دايما في ظهر بعض".
وقال الفنان محمد عبد الرحمن "توتا": "مشروع كبير استمر 7 سنين من الشغل والتعب والضحك وتفاصيل كتير تانيه كنا بنعيشها بحب بس خلاص لكل شيء نهاية بس بتبقي بداية جديده.. وإن شاء الله هنكمل المشوار مع بعض يا أحلي جمهور".
كما وجه الشكر لأشرف عبد الباقى، قائلا: "وبجد بشكر أستاذ أشرف عبد الباقي على الفرصة اللي ادهالنا وصبره علينا وتشجيعه لينا من كل قلبي وبشكر كل الناس اللي ساهمت في المشروع العظيم ده ويارب تبقي بدايه جديده حلوه وفيها برضه مشاريع عظيمه تعجبكم شكراً ليكوا يا أعظم جمهور".
أما الفنان محمد أنور، كتب قائلا:"مسرح مصر اللي استمر علي مدار سبع سنين وقدمنا فيهم 130 مسرحية شكرا استاذ اشرف عبد الباقي علي اصرارك من بدايه المشروع انك ترجع المسرح تاني رغم ان ناس كتير كانت ضدك وتحمسك ان يكون معاك في مشروعك ده وجوه جديده وفضلت واقف جنبنا طول السبع سنين وفرحان بنجاحنا لحد ما الفرقه كلها دلوقتي بقت نجوم ومعروفين في كل الوطن العربي وشكرا لكل زمايلي واخواتي في الفرقة علي احلي سبع سنين في حياتي ..انا بحبكم جدا واتعملت منكم كتير جدااا ويارب نفضل سوا جنب بعض كده طول العمر وشكرا لكل جمهور مسرح مصر في مصر وكل الوطن العربي علي وقوفكم جنبنا وتشجيعكم لينا من البدايه ولحد دلوقتي ونوعدكم بحاجات أحلى".
وكتب الفنان حمدى الميرغنى، قائلا: "شكراً من قلبي لأخويا الكبير وأستاذي أشرف عبد الباقى على 7 سنين أديتنا فيهم الثقة والخبرة والنجاح شكراً علي 7 سنين كنت فيهم أخونا وصاحبنا الجدع شكراً أصحابى وأخواتي ممثلين وفنين وعمال فرقة مسرح مصر على أجمل 7 سنين في حياتي قضيتها معاكم شكراً لأجمل جمهور في الدنيا علي ثقتكم فينا ووقوفكم جنبنا وحبكم لينا دعواتكم معانا في اللي جاى".
وقالت الفنانة ويزو: "شكرا يا رب على النجاح الكبير لمسرح مصر شكرا استاذ اشرف عبد الباقي علي كل حاجه حلوه قدمتها لنا وساعدتنا فيها وبفضل ربنا ثم فضل وقوفك معانا وصلنا للنجاح الكبير دا انا بحبك جدا وفخورة انى كنت شغاله معاك في المشروع العظيم دا شكرا لكل اخواتى واخواتى مش عارفه اقول اصحابي علشان انتو اكتر من اخواتى عشره كبيره بينا فرح وحزن وضحك وهزار وشغل ربنا يخليكو ليا".
بينما قال الفنان كريم عفيفى: "شكرا لكل الناس اللى كانت معانا وفى ضهرنا انتم اعظم جمهور فى الدنيا والى اللقاء قريب فى حاجات احلى واجمل".
فيما عبّر الفنان محمد أسامة "أوس أوس"، عن حزنه لانتهاء مسرح مصر قائلا: شكرا جمهور مسرح مصر.. شكرا استاذ اشرف عبد الباقى .. هتوحشونا".
وكتب الفنان حامد الشراب، قائلا:" شكرا استاذ اشرف عبد الباقى على كل حاجة عملتها معانا من اول بدايات المشروع لحد ما وصلنا ل 130 مسرحية كنا عيلة كبييرة مش مجرد فرقة مسرحية طوول ال 7 سنيين كنت اخ كبييير لينا كلناااا شكرا على مدرسة مسرح مصر شكرا لكا اخواتى اللى وقفت جنبهم على المسرح اتعلمت منكم كتير جدا ويا رب ميحرمنا من لمتنا سوا شكرا لكل كرو الاخراج كرو الديكور شكرا لكل واحد كان فى الكواليس علشان نقدر نطلع 130 مسرحية".
وقال الفنان ابرام سمير: "شكرا يا أحلي جمهور في الكون عيشنا معاكم و عيشتونا فى احلى حلم".
ابرام سمير
أشرف عبد الباقى
أوس أوس
حامد الشراب
حمدى الميرغنى
على ربيع
كريم عفيفى
محمد أنور
محمد عبد الرحمن
مصطفى بسيط
مصطفى خاطر
ويزو