كشف المنتج طارق الجناينى عن إصابة والدته بفيروس كورونا، حيث كتب على حسابه "الكورونا مش عيب ولا حرام.. أنا تقريبا عمرى ما كتبت عن أى مرة توفى أو تعب شخص من عيلتى لأنى بشوف أن دى حاجات شخصية ومحبش أشارك الناس بيها.. إنما المرة دى حاسس إنى محتاج أكتب التجربة دى لأنها ممكن تفيد غيرى".
واستكمل "أمى بقالها تقريبا 3 شهور مش بتنزل من البيت خالص وعاملها كل الاحتياطات اللى تمنع اختلاطها بأى حد غير مقيم معاها فى البيت.. المهم من 12 يوم عزمت 2 صديقاتها على الفطار، علما بأن صديقاتها برضه كانوا إلى حد كبير معزولين عن الناس.. بعد الفطار بيومين ابتدت أعراض الكورونا تظهر على الصديقة الأولى، بعدها بيومين على الصديقة الثانية بأعراض أخف شوية.. طبيعى اترعبنا، مع إن الأعراض عند والدتى لم تتعد الحلق وكحة ودوخة خفيفة".
واستكمل "عملنا لأمى التحليل الأول، وطلعت النتيجة إيجابية لڤيروس الكورونا اللعين للعلم والدتى فى منتصف السبعينات ومن ٣ سنين عدينا بسرطان وما تلاه من علاج كيماوى وخلافه، يعنى المناعة عندها مش فى أحسن حالة..بعد قراية كتير جداً وتواصل مع ٣ أطباء أجلاء، قررت عدم نقلها لمستشفى (فى حالات معينة هى اللى فعلاً محتاجة سراير المستشفيات)، بالإضافة إلى عدم بداية أى دواء من التقال والاعتماد على الآتى فقط:
قرصين أسبرين ١٠٠ بعد الغداء
قرص ڤيتامين C ١٠٠٠مج مرتين فى اليوم
قرص ڤيتامين D مرة فى اليوم
قرص zinc ٥٠ مج
قرص ڤيتامين E
قرص omega 3
وفى حالة أى أضطرابات فى المعدة، قرص nexium قبل الإفطار وعند الحاجة، قرص بانادول إكسترا كل ٦ ساعات
سوائل دافية (ينسون. قرفة. جنزبيل) غرغرة مياه وملح واستنشاق مرتين فى اليوم، بالإضافة إلى صدقات كتير؛ لأنى مقتنع تماما بأن الصدقات ترد البلاء".
وأضاف الجناينى: "الحمدلله الموضوع ماشى تمام، والأمور فضلت مستقرة لغاية ما عملنا تحليل تانى بعد ١١ يوم من يوم العدوى والحمدلله النتيجة طلعت سلبية؛ بس لأن مش دايما النتايج بتكون مظبوطة وهى لسه عندها أعراض بسيطة، فا إن شاء الله هنعمل تحليل أخير بعد اكتمال ١٤ يوم من العدوى وإن شاء الله النتيجة هتكون سلبية..
أتمنى التجربة دى تفيد أى حد هيقراها والناس تاخد حذرها أكتر لأن توقعى اللى أتمنى أكون غلط فيه، أن البلد دى هتعدى بأصعب أسبوعين عدوا عليها من زمان أوى، فأتمنى أن على الأقل الناس تكون واضحة وصريحة مع بعض ومحدش يخاف ولا يخبى لأن الكورونا مش عيب ولا حرام".