أعلنت الفنانة داليا البحيرى، نتيجة مسحة كورونا الخاصة بها وبأولادها، بعد إصابة زوجها بفيروس كورونا وظهور مسحته الخاصة به والتى كانت إيجابية، ونشرت داليا البحيرى منشور عبر حسابها الشخصى على "فيس بوك"، كتبت خلاله: "أحب أطمنكوا جميعا نتيجة المسحات طلعت وألف حمد وشكر ليك يا رب كلها طلعت سلبية ليا وللولاد كلهم والمساعدين فى البيت شكرا يارب على كرمك.. أحب أطمنكوا كمان ان حسن الحمد لله كويس وبيشكركم كلكم على الرسايل والتليفونات بجد حبكم لينا ومساندتكم لينا عندنا بالدنيا وأحلى نعمة من ربنا".
وأضافت: "آسفة إنى ساعات مش بلحق أرد على كل مكالماتكم أو بضطر أقفل فى نص المكالمة عشان دكتور بيتصل على الناحية التانية أو معمل أو صيدلية.. بجد بشكركم على جمال قلبكم واهتمامكم ودعواتكم لأبو على حبيب الكل ربنا يقومه بالسلامة وبشكر كل اللى بعت رسالة عشان مقدر لبختنا.. انتم جميعا فوق الراس وجوه القلب.. ربنا يحفظكم جميعا من كل شر ويحفظ عائلتكم وحبايبكم".
وكانت داليا البحيرى قد أعلنت عن إصابة زوجها عبر "فيس بوك" وكتبت: "أنا حبدأ بألف حمد وشكر ليك يارب، لأن أنا عارفة ومتأكدة إن احنا عملنا اللى علينا وزيادة، حافظنا وقعدنا فى البيت، وعقمنا وطهرنا، وانتقدنا اللى نزل انطلق واتفسَّح، وأنا والحمد لله راضية جدا بقضاء ربنا سبحانه وتعالى، حسن جوزى وحبيبى طلع إيجابى كورونا فيروس، ربنا يشفيه ويعافيه يا رب".
وتابعت داليا البحيرى قائلة: "إحنا كلنا عملنا مسحات تحليل كورونا، أنا والأولاد، واللى بيساعدونا فى البيت، عشان نطمن، لأننا كنا مخالطين لحسن، وبإذن الله نعرف النتيجة بكرة بليل، وربنا يجيب العواقب سليمة يا رب".
وأضافت "البحيرى": "أنا بقول الكلام ده عشان أى حد لازم يعمل كده، لازم يقول، وبكل وضوح عشان الناس اللى كانت مخالطة ليهم يعرفوا، ويطمنوا على نفسهم، لأن دى أمانة، والمرض مش حاجة الواحد يخجل منها".
يذكر أن الفنانة داليا البحيرى، أثناء مداخلتها عبر برنامج زووم فى برنامج مساء DMC، على قناة DMC، والذى يقدمه الإعلامى رامى رضوان: منذ أيام قليلة قالت "إن الزعيم يمتلك كاريزما لا توجد عند أى شخص غيره، وهذا ما يجعله متميزا وناجحا، فهو فريد من نوعه، وكانت آخر مرة أقف أمامه فى الكاميرا منذ 12 عاما، لذلك عندما وقفت أمامه فى مسلسل" فلانتينو"، والذى عرض خلال موسم رمضان الماضى، شعرت وكأنها المرة الأولى مما انتابنى شعور بالقلق والخوف".