مر الفنان الشاب بوعكة صحية، حيث أصيب بقرحة شديدة فى المعدة جعلته طريح الفراش لمدة أربعة أيام، وفى تصريح خاص لـ"عين" قال كريم: "مريت بأيام صعبة جدا، وظلت 4 أيام مش قادر اتحرك، ولو روحت الحمام دى تبقى معجزة من عند ربنا وموارب باب الشقة عشان الديليفرى بتاع الصيدلية أو المطعم لما ييجى يدخل علطول عشان مش هقدر بجد أقوم أفتح الباب، ومعظم أصحابى عارفين إنى عايش لوحدى، المهم إنى نزلت ستورى لعلاجى الكتير والحقن اللى باخدها وكتبت إنى تعبان".
وأضاف: "الكوميديا كلها بقى إنه جالى 3 مكالمات بالظبط من ناس، هما آه أصحابى طبعا، لكن مش قريبين، وبنتقابل كل فترة كبيرة.. وكام رسالة كده من نوعية مالك يا بنى فيه إيه.. ومش هنحسب الريبلايز بتاعة الستورى عشان ده هنعتبره مجرد كومنت كده، وأنا مش هحسب الكومنتات إنها اهتمام أكيد، طب ليه أنا بكتب الكلام ده.. لإنى فاكر كويس إن فيه فى عندى من 3400 شخص شافوا الاستورى يجيلى 3 مكالمات ومش ناس قريبة أصلا".
أكد كريم فى النهاية أن صحته تحسنت وأصبحت أفضل من الأيام الأولى، ووجه الشكر لمن سأل عليه.
يذكر أن كريم سرور هو كان أحد أبطال مسلسل "الأب الروحى 2"، وأثنى الجمهور عن دوره، خصوصا فى آخر مشهد قام بتجسيده، وذلك من خلال دور "أمير سلامة"، والذى جسّد فيه العديد من المشاعر عندما قام "نوح" الذى يقوم بدوره الفنان "محمد محمود عبد العزيز" بقتل حبيبته "حنة"، التى أدت دورها الفنانة راندا البحيرى.
ووصف الكثير من الجمهور أداء سرور بأنه كان تلقائيًّا، وبدت دموعه حقيقية للغاية، ما دفعهم لا إراديًّا إلى البكاء؛ كما كتبت الفنانة راندا البحيرى فى تعليق لها: "شكرا علشان وقفت قدام ممثل بجد. ممثل بيخاف على مستقبله وبيحترم الناس اللى قاعدة تتفرج على المسلسل، وعايز يقدملهم آخر حاجة عنده حتى لو هييجى على نفسه وهيموتها. أنا اللى محظوظة جدا إنى وقفت قدامك واشتغلت معاك أنا اتعلمت منك كتير. وأتمنى إنى أشتغل قدامك تانى".