قال النجم محمد هنيدى: من صغرى وأنا بحب الإذاعة والراديو، وجربت أشتغل فلقيت الموضوع ظريف، وإنها حاجة جميلة إنك توصل إحساسك بصوتك من غير ما حد يشوفك، وده عملته من خلال دوبلاج أفلام الكرتون، وده حصل من خلال لايون كينج وتيمون وبومبا.
وأضاف خلال لقائه فى برنامج "كلمة أخيرة" تقديم الإعلامية لميس الحديدى المذاع على قناة ON: لما نجحت دبلجة تيمون وبومبا، اتعرض عليا من ديزنى إننا نعمل 80 حلقة، وقلتلهم أنا هاعمله فى 10 أيام فلم يصدقوا، وكان السبب فى كده إنى كان نفسى أجيب عربية بتكييف عشان كان معايا عربية صغيرة ومفيهاش تكييف، وكل ده عشان آخد الـ10 آلاف جنيه بسرعة، وفعلاً خلصت المسلسل فى 10 أيام، وجالى واحد خواجة من ديزنى وقدملى شهادة تقدير.
وتابع: بعد ما عيشت 10 أيام فى الحالة الكرتونية دى، ابتديت أتجنن وجتلى حاجات كتير زى "شركة المرعبين"، وعملنا 5 مواسم من سوبر هنيدى، ودى حاجة بتبسطنى حاليًا إن كل رمضان بيكون ليا مسلسل، ولازم نهتم بالدبلجة باللهجة المصرية؛ لأنها مهمة جدا.
يذكر أن برنامج "كلمة أخيرة" تقديم الإعلامية لميس الحديدى، ويذاع من السبت إلى الثلاثاء، فى تمام التاسعة على شاشة "ON".