قالت المخرج إيناس الدغيدى، دخلت معهد سينما صدفة لأنى كنت فاشلة، والموضوع بدأ لما صديقة ليا قالتلى ندخل أكاديمية الفنون، وأنا مليش فى الفن وكده، وقالتلى هنقدم ونشوف وقلتلها مقدرش أدخل التمثيل لأن أهلى يقطعوني، فدخلت معهد السينما قسم الإنتاج.
وأضافت خلال ندوة تكريمها بمهرجان الاسكندرية السينمائى، "طلبة المعهد كانوا بيصطاوا البنات الحلوة ويغششوهم، فغششونى وقتها، ودخلت قسم الانتاج، وتخيلت مش هيدخلوني، ولقيت طلبة أقسام الإخراج وكده مرفهين أكتر وحسين فهمى ومخرجين كبار بيدرس ليهم، فقررت أحول إلى قسم الاخراج، وانا من دفعة عمر عبد العزيز.
وتابعت، أنا لما كنت فى سنة تالتة كنت بشتغل مساعدة مع صلاح ابو سيف وبركات وكمال الشيخ، وطبعا حسيت انى فى دنيا تانية وعالم آخر وكملت مشوار الإخراج.
واستكملت، انا دايما بقول جوايا حاجة ذكورى تجاه المجتمع ده، ووعى مش حاسة ان فى فرق لانى لما اخترت مواضيع، ومكنتش متخيلة ان فى مخرجة وكانت المنافسة قوية لان كل المخرجين شغالين، ومفيش منتج هيؤمن بميزانية فيلم ويسندها لمخرجة، وكمان مش مؤمنين يكون فى مخرجة مساعده أولى.
وحضر ندوة تكريم المخرجة إيناس الدغيدى بمهرجان الاسكندرية السينمائى لدول البحر الأبيض المتوسط، الناقد الأمير أباظة رئيس المهرجان، الفنان عزت العلايلي، الفنانة الهام شاهين، المخرج عمر عبد العزيز، خالد عبد الجليل مستشار وزيرة الثقافة، أدار الندوة الأمير أباظة.
