قرر النجم محمد هنيدى أن يستجيب لأسئلة جمهوره ومحبيه عبر صفحته فيس بوك"، لمدة 47 دقيقة بطريقة كوميدية، وتلقى سؤالاً عن إن كان لديه موهبة أخرى غير التمثيل واختار هذا السؤال ليجيب عليه قائلاً: "رابر.. وفيه تراك قريب هدس فيه السين كله من أول مروان موسى لـ أبيوسف"، مؤكدًا أنه يحب مطرب الراب شاهين قائلاً: ومش هقرب لشاهين عشان شاهين حبيبي.
واستكمل الجمهور فى أسئلة هنيدى ومنه السؤال المعتاد عن طول النجم الكوميدي وأجاب عليه هنيدى قائلاً: "في الصيف بيوصل لـ 199 .. في الشتا بكش شوية ويمكن الناس واخده فكرة غلط عني بسبب أن كل أعمالي بصورها في الشتا".
وروى النجم للجمهور عن السبب الحقيقى وراء قصره بشكل كوميدى وقال: "زمان كان نفسي أبقى ضابط وقبل اختبارات الكلية رحت جيم جنب البيت.. الجيم كان معمول في الشارع وكان عم سعد المدرب ربنا يسامحه بيشيلني أوزان تقيلة أوي وأبويا كل مايعدي علينا يقوله حرام عليك الواد مش هيبان من الأرض، وعم سعد يقوله أنا عارف أنا بعمل إيه، وأنا أقول لعم سعد سيبك منه أبويا متغاظ عشان أخيرًا هكسر سلو العيلة وهبقى أول واحد طويل في العيلة، المهم جيت اختبارات الكلية وعم سعد اقنعني أني بقيت طويل جدا.. والمشكلة أني ماكنتش بشوف أي بشر غير عم سعد فمكنتش عارف أطوال البشر وصلت لفين، لغاية يوم التقديم لما رحت الاختبارات ورفضوا يدخلوني وقالولي مفتحناش التقديم لخريجي الابتدائية".
