على مدار أيام، لم تكن "بوستات"، وتعليقات" المطربة الشابة إيناس عز الدين نجمة برنامج "أراب أيدول"، مريحة بالنسبة لجمهورها، فقد تحدثت إيناس فى أكثر من تعليق لها عن الصعوبات التى تواجهها كمطربة شابة تريد أن تجد لنفسها طريقا تسلكه لتستكمل مشوار النجومية الذى بدأته بإظهار موهبتها من خلال برنامج أراب أيدول، ويبدو أن الجمهور العريض الذى كونته إيناس من خلال هذا البرنامج، وإشادات كبار النجوم مثل أحلام ونانسى عجرم ووائل كفورى بصوتها، لم يكن كافيا لتتمكن من السير دون أزمات ومضايقات وحروب فى هذا الوسط، لتقرر إيناس أمس الاعتزال، وتصدم جمهورها ببوست اعتذار شرحت من خلاله كل ما عانته لاتخاذ هذا القرار.
وكتبت إيناس قائلة: "فى يوم من الأيام ومن حوالى 10 سنين فى بدايات دخولى المجال كنت بنوتة صغيرة طموحة وكنت مقربة لناس كتير فى الوسط الفنى اتعرض عليا دور مهم فى فيلم كسر الدنيا بس الدور كان من الأدوار إياها وطبعا رفضت واللى عملت الدور ربنا اكرمها وبقت نجمة كبيرة من نجوم الصف الاول يا عالم يمكن لو كنت عملت الدور كنت بقيت مكانها ووارد برضوا لاء بس عمرى ما ندمت على رفضى للدور ده لانه ضد مبادئى اللى طول عمرى بقول عليها ونفسى امشى عليها ومن يومى وانا اخدة قرار انى عايزة انجح زى ما انا بموهبتى بس وكان عندى شبه يقين ان فى يوم من الايام الموهبة بس هى اللى هتنفعنى لحد ما اكتشفت واتأكدت ان الموهبة وحدها لا تكفى ولازم تدخل عناصر كتير أولها وأهمها الفلوس والا لو مش معاك وعايز تشتغل تبقى فى نظر البعض متسول فنيا زى ما اتقال من كام يوم من احد صناع الاغنية على الفنانين اللى ما عندهمش امكانية الانتاج وبيطلبوا المساعدة احيانا أو لازم يكون عندى واسطة تقيلة تدخلنى الوسط بسهولة أو يبقى عندى استعداد اتنازل سواء التنازلات اياها أو اتنازل فنيا واقدم شغل من اللى بيجيب فلوس وينحت ويأكل عيش بعيدا عن مصطلح كلمة فن".
وأضافت: "طبعا مش بقول ولا أقدر اقول ان كل الناس الناجحة اتنازلوا ولا كان عندهم واسطة ولا معاهم فلوس ولا بيقدموا فن هابط ولكن احيانا بيبقى فيه ناس حظها حلو مع شوية توفيق من ربنا ولكن دول نسبة قليلة فى الوسط خاصة الناس اللى بتطلع دلوقتى لان الزمن ده وضع الانتاج فيه مختلف غير الزمن والعصر اللى طلع فيه ناس بقوا نجوم دلوقتى الزمن اللى كان فيه انتاج وحفلات وشرايط كاسيت ومكسب".
وختمت حديثها قائلة: "علشان كده تأكدت انى ماليش مكان فى المجال ده مع انه اكتر حاجة حبيتها واخلصت ليها طول حياتى وكان عندى أمل اعمل شيء كويس بس حقيقى فشلت وعلشان كده فيه واجب اعتذار منى لكل الناس اللى وعدتهم فى يوم من الايام انى اكمل وانجح بعتذر لكل الناس اللى ساندونى من اول يوم فى ظهورى للناس اللى صوتى من غيرهم مالوش قيمة وكانوا معايا على المرة قبل الحلوة الناس اللى ساندونى وساعدونى فى كل مراحل حياتى بقولهم أنا اسفة انى وعدتكم وفشلت، بس صدقونى مش ذنبى بس انا ما عرفتش احفر مكانى".
