اعتذر الشاعر الغنائي والسيناريست أيمن بهجت قمر، اليوم السبت، للنجم عمرو دياب، بعد خمس سنوات من الخلاف، إذ أكد قمر أنه أقحم عمرو دياب في مشكلته مع شركة روتانا.
وقال أيمن بهجت قمر في تدوينة عبر حسابه الشخصي بموقع التواصل الاجتماعي "فيس بوك"، "أنا بقالي فتره بفتح صفحة جديدة مع كل الناس عشان كده مش هتكبَّر النهارده إني أعتذر وأبارك لأخويا الكبير وعشرة العمر الفنان عمرو دياب على الألبوم الجديد".
وتابع: "خمس سنين زعل كتير أوي بصراحة وأنا غلطت لأني أقحمت عمرو في مشكلتي مع روتانا وغلطت أكتر لأني أظهرت الخلاف ده في العلن، ولكن الواحد طول الوقت بيتعلم ومحدش كبير على الاعتذار".
واستطرد قمر: "ويا عمرو زي أنا ما غلطت في العلن أنا بعتذر لك في العلن، إنت فوق إنك فنان كبير إنت أخ حقيقي على المستوى الشخصي أنا افتقدته وعفا الله عما سلف".
واختتم: "وعايز أقدم برضه اعتذار لجمهور عمرو اللي زعل على زعله وحقكوا على راسي من فوق.. وصافي يا لبن".
