خدنى فى طريقك جملة تقال فقط بين الأصدقاء، لذلك قرر مجموعة من الأصدقاء أن يجعلوا تلك الجملة متداولة بين أفراد لا يعرفون بعضهم من خلال جروب "توصيلة" وتحت عنوان: "فى ناس كتير معاها عربيات بتزهق من كتر ما بيعملوا مشاويرهم لوحدهم، وفى ناس أكتر مش معاها عربيات وبيطلع عنيها فالمواصلات"، بدأ جروب "توصيلة" بمجموعة من الأصدقاء وامتدت لأكثر من 3 آلاف مشترك بالجروب.
ويقوم أصحاب السيارات بكتابة المكان المتوجهين إليه والأماكن المتوافرة معه داخل السيارة على الجروب ليتواصل معه الأعضاء الراغبون فى التوجه لنفس المكان.
ويقول "محمد قشطة" ذو الـ30 عاما، أحد أدمنز الجروب لـ"عين": "الفكرة بدون مقابل لأن اللى نازل بعربيته هو كده كده رايح نفس المشوار، ممكن يتقاسموا فلوس البنزين لو بيركبوا مع بعض كل يوم".
وعن وسيلة الأمان خاصة بالنسبة للفتيات، يقول قشطة: "البنات كانت قلقانة الأول لكن مفيش بوست بيتقبل إلا لما بنعرف الشخص ونعرف هنوصله إزاى.. ولو بنت هتركب مع ولد بناخد رقمه ورقمها ونتابع التحرك من أول ما يتحركوا لغاية ما يوصلوا"، قائلا: "إحنا كل يوم بنركب مع تاكسى متعرفوش بالعكس هنا فى ميزة إن كل الناس عرفنها".
أما خطواته المقبلة، يقول إنه يفكر بإصدار أرقام عضوية لأكثر الأشخاص المتفاعلة على الجروب والذين أصبحوا محل ثقة كبيرة حتى يمكن التعامل معهم بشكل أبسط فيما بعد، والخطوة الثانية ستكون بعمل تطبيق يحمل نفس الاسم لاستفادة عدد أكبر، ولكن سيكون برقم البطاقة وصورة الرخصة لكى يكون أكثر أمنا.