يعد محمد أنور واحدًا من أبرز نجوم مسرح مصر ونجوم الكوميديا بصفة عامة الذين برزوا على الساحة الفنية خلال السنوات الأخيرة، من خلال إفيهاته العديدة التى اقترنت به وميزت ظهوره دائما.
نجم مسرح مصر خطف الأضواء مؤخرا عبر اللوك الجديد الذى كشف عنه على حسابه عبر إنستجرام بظهوره بالشنب لأول مرة فى تاريخه الفنى، ما جعلنا نجرى معه هذا الحوار الذى سيطرت عليه الكوميديا وإفيهات أنور بخصوص الشنب فى حياته بصفة عامة.
محمد انور
1/ الشنب ليه علاقة بلوك دور جديد أم لا؟
إطلاقاً ملوش علاقة نهائى بأى دور والدليل أنى حلقته بالأساس.
2/ أُمال ربيته ليه وغيرت شكلك؟
أثناء حلاقة ذقنى بنفسى حبيت أشوف شكلى به فقط للمرة الأولى، وبالتالى رغبت فى معرفة رأى الناس بخصوصه من خلال إفيه على إنستجرام كتبت فيه "معرفتش أربى شنبى قلت أربى عضلاتى".
شنب محمد انورعلى انستجرام وتعليقات الجمهور عليه
3/ ليه حلقته بسرعة؟
حفاظا على بيتى وأسرتى، لأنهم استغربوا تماماً منى وطالبونى بأنى أحلقه.
4/ أول مرة ربيت شنبك كانت امته؟
فى الإعدادية لما بدأ يظهر سبته خلال فترة المراهقة زى شباب كتير بيحبوا يحسوا برجولتهم وأنهم كده صايعين.
5/ حلقته إمته أول مرة فى حياتك؟
تانية ثانوى حلقت شنبى، وقلت كفاية كده، ومن وقتها ما ربيتوش تانى.
6/ ردود الفعل على ظهورك بشنبك كانت إزاى؟
أغلب ردود الفعل كانت إيجابية خاصة من الأولاد والشباب أصحابى، لكن البنات أغلبهم ما كانش عاجبهم، وقالولى ليه كده مغير شكلك.
7/ أغرب رد فعل جالك عليه؟
على ربيع سكت لما شافنى وقالى بص هو حلو جدا والمفروض تستغله وتعمل دور واحد بيسرّح مراته.
محمد أنور وعلى ربيع
8/ ممكن تربى شنبك علشان دور معين؟
طبعاً ممكن أحلق زيرو كمان لو تطلب الأمر، وكان الدور عاجبنى وحاسس إنه ها يضيفلى.
9/ إيه أهم شنب من وجهة نظرك بتقدره فى الفن المصرى؟
شنب أحمد عبد العزيز بدون أدنى شك؛ لأنه عمل بيه كل حاجة وكل الأدوار اللى انتصر بيها على كل الأشرار، ولعب أهم الشخصيات البطولية.
أحمد عبد العزيز
10/ طب أكتر شنب بيخوفك؟
عشماوى كنت بخاف من شنبه جدا.
11/ وفى الحقيقة عائلتك مهتمة بتربية الشنب كنوع من الهيبة والوقار أم لا؟
أعمامى فى الغالب حريصون على ذلك، أما أخوالى مش بيعملوا كده نهائى تقريبا.
12/ ما سبب عودة موضة الشنب والذقن بصفة عامة للمسلسلات والأفلام مؤخرا؟
ظاهرة ملهاش تفسير غير محبة الناس للمسلسلات التركى اللى أبطالها بيظهروا فى منتهى الجمال بالذقن والشنب.
الشنب فى الدراما التركية
13/ شايف إنها هتنتشر الفترة اللى جايه ولا صعب؟
احتمال، لكن مش مع أى حد أو ممثل ممكن الناس تتقبله بالشنب.
14/ يعنى إيه؟
يعنى مهند البنات والجمهور عادى جدا يشوفوه بشنبه أو من غيره من خلال أى لوك، لكن عم سليمان عيد على سبيل المثال لا.
سليمان عيد
15/ أبرز الممثلين جوه مصر اللى شايفهم أثروا على الشباب بشنبهم؟
أمير كرارة بكل تأكيد مع نجاحه فى شخصية سليم الأنصار كتير حبوا يقلدوه ويعملوا زيه، وبالفعل شوفنا كتير فى الشارع ربوا شنبهم.
أمير كرارة سليم الأنصارى