بلاحظ عبر وسائل التواصل الاجتماعى، أن لما حد بينزل صورة ليه فى مشهد شارك بتمثيله.. أن الكل بيدخل ويبارك ويهلل ويدشن نجم جديد قادم بسرعة الصاروخ.. لكل دول بأنصح وأقول: اوعى تصدق أنك كده نجحت ووصلت.. ما كانش حد غلب.. النجاح هو تراكم لأعمال تلو الأخرى ترسخ فى عقل وذهن المتلقى.. لتفرز فى النهاية ممثل ناجح.. ومش شرط تبقى نجم يكفى أن تكون نجم المشهد اللى بتشارك فيه.. لكن النجومية عبر صور تنشر على الإنستجرام هى نجومية زائفة.. زى رغاوى الصابون.. بلا أى تأثير.
لأن عمر ما حد عرف ولا هيعرف خلطة النجاح.. وإلا ما كنش حد فشل.. النجاح كالحادثة يفسر بعد حدوثه.. والأمثلة على ذلك لا حصر لها.. صلاح جاهين بقدره العظيم.. خرج من إنتاج فيلم خلى بالك من زوزو.. والفيلم نجح نجاح لا مثيل له.. لأن سر النجاح لا يعرفه أحد.. فكرونى لما كنا فى مسرح الجامعة ونبقى عاملين رواية ناجحة جدا وبنمشى نجوم بين الطلبة لكن خارج أسوار الجامعة محدش يعرفك.. فلا تتسرعوا النجاح ما فيش حد يقدر يقف أمام موهبة ويمنع وصولها للناس طالما أنت مصدق فى نفسك مش فى وسائل الاتصال زائفة النجاح.