تعرضت الفنانة سهير رمزى لهجوم حاد من رواد مواقع التواصل الاجتماعى، بعد انتشار صورها لها بدون حجاب، الأمر الذى أكدته فى تصريحاتها بأنها تركت الحجاب بشكل نهائى.
وقالت الفنانة سهير رمزى، أنا مش حابة أتكلم فى موضوع الحجاب لأنى اتكلمت كتير فيه، ولأنه موضوع شخصى، وليس من حق أى شخص التدخل فى أمورى الشخصية لأنه موضوع شخصى بحت، مشيرة إلى أن الزوج لا يستيطع فرض الحجاب على زوجته، واللى بيحاسب ربنا مش عباده، والناس بقيت بتتدخل فى حياة بعض بشكل فظيع.
وتابعت: تعرضت لهجوم بشكل كبير فى الفترة الأخيرة على كل تصرف أعمله، فمثلا هاجمونى لما نزلت "قصة" من شعرى، وهاجمونى لما لبست "بورنيطة"، وحاليا بيهاجمونى عشان قلعت الحجاب، ده كلام مهم برده اننا نتكلم فيه، فى حاجات كتيرة أهم من كده نتكلم فيه عن أعمالى وشغلى كفنانة أو عمل جديد داخلة فيه أو تكريم ليا فى مهرجان. غير كده كلها أمور شخصية تخصنى وحدى.
وأضافت فى تصريحها لـ "عين": خلعت الحجاب بشكل نهائى وانا مقتنعة بذلك كما كنت مقتنعة بارتدائى له منذ 25 عاما فى عز نجوميتى وشبابى وضحيت بشغلى وبعدت عنه، وانا مش صغيرة انا ست كبيرة فى السن، اشيل أو أحط، أو اخفف شوية ده شئ يرجعلى ومش من حق حد يقولى قلعتى الحجاب أو لبسته ليه.
وأشارت إلى أن إرتدائها للحجاب كانت لعدة أسباب منها التقرب من الله بشكل أكبر وأستطيع الصلاة وتأدية فريضة الحج والعمرة، والجلوس بجانب والدتى المريضة وقتها، والتزمت بالحجاب وبعدت تماما عن مجال الفن والتمثيل لمدة 25 عاما.
واستكملت حديثها، أنا لبست الحجاب بإقتناع وحاليا تركته بإقتناع، لأن صلتى بربنا مش شرط ليها حجاب، لأن صلاتى وقربى من الله واحتشامى واحترامى وحفاظى على عاداتى وتقاليدى وعلى بيتى أهم حاجة، وفى امثلة لستات كتيرة محجبات ومش كويسين من جواهم، وفى ستات مش محجبات وكويسين جدا وبيتعاملوا بشكل راقى وبإحترام.
وعن رأى زوجها قالت، زوجى لم يعترض على ملابسى من أول ما تزوجنا، ولا عمره اتحكم فى موضوع لبسى، لأنى زى ما قلت انها حاجة تخصنى وأهم شئ انى محافظة على نفسى واحترامى له ولنفسى، لأنى كما قلت أهم شىء التربية والعادات والتقاليد التى تربينا عليها.
ووجهت رسالة فى نهاية حديثها، ياريت كل شخص يركز فى حياته وفى أهداف مهمة ولا يتدخل فى خصوصية الآخرين لأنها ليست من حق أى حد غير الشخص نفسه، ولو الموضوع فى أذية فهيكون لنفسى مش لحد تانى.