يعنى إيه بنت "شمال"؟

2013/06/18 - 17:16
نسخة للطباعة

"دى شمال" شمال اللى نقصده مش الاتجاه يمين أو شمال، لأ دى كلمة انتشرت بين الولاد، كتير من الشباب بيقولوها على البنات، لكن الجديد اللى انتشر الأيام دى إن بنت تقول على بنت تانية "شمال"، يعنى إيه أصلا شمال وأمتى تقول البنت على بنت تانية كده؟ ده كان سؤالنا للبنات عن مفهومهن عن البنت الشمال، وده اللى عرفناه من سلمى محمود وصاحباتها اللى كل واحدة فيهم كان ليها رأى مختلف ونظرة لما بتحكم على البنت وتقول إنها "شمال"، فكان رأى سلمى إن البنت الشمال بتبان من لبسها ومشيتها وطريقة كلامها، وأحيانا بنعرفها من صوتها وهى ماشية فى الشارع وضحكتها العالية اللى بتلفت نظر الولاد، ومنة كمان رأيها زى رأى سلمى، أما آلاء فقالت إن البنت الشمال بنعرفها من صورتها على "الفيس بوك" وطريقة لبسها وبتبرر ده بأنها ميهمهاش كلام الناس وأنها بتعمل اللى هى عايزاه، ودى طبعا حجج تبرر اللى هى بتعمله، وكمية الولاد اللى فى حياتها كمان بتكشفها، وهما فاكرين إن هى كده تبقى open minded مع إن لو البنت دى جت وإحنا واقفين مع أصحابنا الولاد وفضلوا يهزروا معاها ويتكلموا ويضحكوا اسمعوا بقى التعليقات بعد ما تمشى، بجد لو حد سمعها وشه هيجيب ألوان، فقاطعتها سلمى وقالت كمان البنات على "تويتر" أنا مش فاهمة هما ليه بيشتموا بكلام مينفعش بنت تقوله، وبيقولوا إن البنت دى هى بقى بنت الناس النضيفة، النضافة مش باللبس، أو أنها تلبس بكينى وتحط صورتها على "الفيس بوك"، البنت يعنى الحياء والخجل مش الانفتاح الزيادة عن اللزوم، والكلام فى موضوعات مينفعش تتكلم فيها مع أصحابها الولاد، وفى الآخر تقول على نفسها إنها كده مودرن وكل دى طبعا حجج عشان كل واحدة تبرر لنفسها اللى بتعمله، وبعد نقاش طويل بين سلمى وصاحباتها كانت النتيجة، إن كلهم اتفقوا على إن الأسباب دى كلها هى اللى بتدفعهم يقولوا كلمة "شمال" على بنت، وبرضه اتفقوا أنهم هيحاولوا ينبهوا أى بنت بتتصرف كده عشان الولاد بيصاحبوا البنات دى، وبيتكلموا عليهم بعد كده مع بعض وحش، مع إن البنت بتكون فاكرة إنهم متقبلين أفعالها وتصرفاتها.

أضف إلي

أضف تعليق