أعلن النجم تامر حسني تعاقده لأول مرة مع شقيقه المنتج حسام حسني، لإنتاج فيلمه الجديد، وذلك بعد سنوات من رفضه للتعاون بينهما بسبب قلة خبرته.
ونشر تامر، صورة له مع شقيقه حسام، عبر حسابه على إنستجرام، وكتب عليها قائلا: " الصورة دي والفرحة اللي في ضحكة حسام أخويا لازم أكلمكوا عنها، دا حسام أخويا الكبير كان نفسه يدخل عالم الإنتاج الفني من ٥ سنين و ينتجلي وانا الحقيقة كنت دايماً برفض و كان بيزعل مني بس كنت دايماً بشرحله انه لازم يدرس السوق الأول و ميعتمدش عليا و يفهم و يذاكر كتير أوى مش عشان ينتج لاااااا عشان يكون منتج شاطر".
وتابع تامر، فى حديثه: "و فعلاً عمل كدا و استوعب كلامي و بدأ يتفرج و يتابع كل اللي بيحصل من أول فيلم أهواك و تصبح على خير لحد ما شارك بجزء بسيط في إنتاج فيلم البدلة وأشرف على إنتاج ألبومي عيش بشوقك، و انتوا اكيد شايفين العملين طلعوا ازاي للناس وازاي نجحوا والحمدلله كل عمل فيهم في السنة دي حقق نجاح كبير جداً ، انا في الصوره دي كنت قاعد بمضي عقد اول فيلم إنتاجه وكان بيقولي (طلعت عيني عشان القعدة دي) و انا كنت بقوله إوعى تزعل مني انا كنت بعلمك تكون قد المسؤولية لوحدك".
واختتم تامر حديثه، قائلا: "ودلوقتي بأمانة انت قدها وانا اللي فخور انك بتنتجلي عشان شايفك بجد شخص بقى شاطر جداً و مجتهد و بتفكر صح و شركتك دلوقتي فيها اقوى الأفراد من كل الجوانب و انا فخور بيهم كلهم فعلاً ،الف مبروك يا حبيبي يا اخويا الكبير ياللي ياما علمتني حجات جميله وانا صغير النهارده بردهالك من قلبي و بدعيلك ربنا يكرمك و يكرمنا جميعاً و يكرم كل مجتهد و تكمل مشوارك و تنتج ليا و لغيري".
تامر حسنى