احتفلت الفنانة ليلى علوى، بعيد ميلاد شقيقتها الصغرى لمياء، واسترجعت ليلى ذكرى يوم مولد شقيقتها عبر حسابها على إنستجرام.
ونشرت ليلى، مقطع فيديو لصور تجمعها بشقيقته، وكتبت عليها قائلة:"4 ديسمبر، يوم ما اتولدت أختى الصغيرة كان يوم مهم جداً فى حياتى، ومش ممكن أنساه كنت فرحانة إن بقى ليا اخت، وإنى هلعب معاها بس زعلت أوى يوميها عشان ماما باتت فى المستشفى، وما كانتش بايتة فى البيت".
وتابعت ليلى، قائلة: "بس تانى يوم لما روحت وشوفتها حبيتها علطول، وكنت حاسة إنها العروسة بتاعتى اللى هاخد بالى منها ولغاية النهاردة بس الآية اتقلبت، بقت هى اللى بتاخد بالها منى وهى العيلة والسند وضهرى وهى اللى بتحفزنى على كل حاجة حلوة فى الحياة بعشقها وبحبها هى إنسانة نادرة بأخلاق الأمراء بجد هى وجوزها وطلعت بناتها كده كمان".
واختتمت ليلى تهنئتها لشقيقتها، قائلة: "بحبك يا أحلى أخت فى الدنيا يا بنتى وصاحبتى وكل حاجة فى الدنيا.. بوسة كبيرة وربنا يخلينا لبعض".