أشادت الفنانة جيهان خليل، بقرار الرئيس عبد الفتاح السيسى، بقرار تعليق الدراسة فى الجامعات والمدارس، لمدة أسبوعين، اعتبارًا من غد الأحد، وذلك فى إطار خطة الدولة الشاملة للتعامل مع أى تداعيات محتملة لفيروس كورونا المستجد، قائلة: "أنا سعيدة جدا بقرار تعليق الدراسة ولازم نلتزم به بالشكل المظبوط، يعنى مينفعش الطلاب ينزلوا المولات والأماكن العامة والتجمعات ويتريقوا على الموضوع ويفتكروها إنها إجازة".
وأضافت فى تصريح خاص لـ"عين": أنا عارفة إن الناس هتتريق على كلامى بس مينفعش تروح مكان عام وتنقل العدوى لأسرتك حتى لو مناعتك قوية ومش فارقة معاك فأنت هتروح للبيت وممكن تكون والدتك حامل أو والدك تعبان أو جدك وكبار فى العمر، وبكل بساطة بتقتلهم بأنك تنقلهم العدوى وباستهتارك شوية إنسانية ورجولة وشهامة تجاه أسرتك.
وتابعت: "يا ريت منسمعش للناس اللى بيتكلموا على مواقع التواصل الاجتماعى بشكل كبير لأن أغلبها حاجات مفبركة وتهويل على الفاضى، لأننا محتاجين مبادرات حقيقية، ونفسى مثلا لو تعليق الدراسة هيمتد يكون فيه تطبيق على الموبايل ويتطوع خلاله المدرسين بإعطاء الدروس عن طريق هذا التطبيق ويكون في رقيب زى المدرسة بس عن طريق الإنترنت.
واختتمت حديثها، أنا ممكن أتطوع فى عملية إعطاء الدروس لأن قبل ما أكون ممثلة فأنا كنت مدرسة، وممكن كمان يكون في حملة توعية من كل الفنانين والممثلين، ورجال الأعمال يساهموا باللى يقدروا عليه وأقل حاجة ممكن نقدمها تجاه بلدنا وأهالينا وربنا يحمينا جميعا.