أحمد العوضى: انا وياسمين عبد العزيز متجوزين من وقت عيد ميلادها

احمد العوضي احمد العوضي
 
كتب بهاء نبيل
كشف الفنان أحمد العوضى عن بداية علاقته بالنجمة ياسمين عبد العزيز، قائلا، في البداية تم ترشيحى في مسلسل "لأخر نفس" وأنا كان نفسى أشتغل مع النجمة ياسمين عبد العزيز، والشركة لما رشحتنى قاولوا لى إنه دور ضابط وأنت قلت مش هتعمل دور ظابط، ولكن لما عرفت إن ياسمين عبد العزيز البطلة قلت لها لا عادى أنا أعمل الدور مفيش مشكلة.
 
وأضاف العوضى خلال لقائه في برنامج "معكم" تقديم الإعلامية منى الشاذلى، المذاع على قناة CbC، لما روحت ياسمين شافتنى وحطت إيدها على كتفى بشكل جامد كدة وأنا مش شايف مين وهى لابسة نضارة، فكنت مستغرب مين ماسكنى جامد كدة، يعنى قفشة في البداية كدة نص نص بس بهزار.
 
وتابع، تانى يوم بقى روحت البروفة فلقيت المخرج قاعد وفى كرسيين جنبه فاضيين، فقلت لما أقعد على الطرف هاتيجى تقعد في النص مش هاعرف أتكلم عشان هتتكلم مع المخرج برده، فقررت أقعد جنب المخرج وميكونش في كرسى فاضى غير اللى جنبى وحصل فعلا وجت سلمت عليا وقلتلها معلش مش معايا نسخة من السكريبت ممكن أبص معاكى فقالتلى اتفضل عادى، وأتكلمنا بقى وكلمة منى وكلمة منها وضحكت يبقى خلاص قلبها مال، والموضوع جه زى أي علاقة عادى تعارف وإعجاب وحب ثم زواج.
 
وأشار إلى أن الزواج لم يكن في شهر مايو وقت إعلانهما ولكن منذ شهر يناير في وقت عيد ميلادها كانا بالفعل متزوجين، ولكننا لم نعلن لأن في البداية احنا مش ضامنين العلاقة هتكمل ولا لا وكنا بنتخانق ونسيب بعض ونرجع تانى لبعض وهكذا ونخاف نقول على العلاقة وتفضل فتتحسب عليها علاقة وخلاص.
 
واستكمل: كنا متفقين أننا هنعلن على الزواج في شهر رمضان عشان نكون مركزين في تصوير المسلسلات اللى عاملينها، لكن لما صور العيد ميلاد نزلت الدنيا قامت مقعدتش، وبخصوص الأخبار اللى كانت بتنزل بان ياسمين أكبر منى بـ 12 سنة، ده غير صحيح هي أكبر منى بـ 6 سنوات فقط وحتى لو أكبر من كدة عادى، ولما أعلنا الساعة 4 الفجر كان عشان ياسمين اسمها ميتحطش في سياق مش كويس وأعرف الناس أن الست دى تخصنى.
 
وشارك أحمد العوضى فى أحدث أعماله من خلال مسلسل "شديد الخطورة"، ‏الذى يعرض على منصة watch it، ويتناول قضية الهاكرز ‏وخطورتهم على الأمن ‏القومى واستخدامهم بشكل كبير فى ضرب مؤسسات ‏الدولة.‏
 
مسلسل "شديد الخطورة" يخطط تقديمه على أكثر من جزء كل جزء 7 حلقات على منصة watch it  الرقمية، ويشارك فى بطولته أحمد العوضى وريم مصطفى، رياض الخولى، هادى الجيار، محمود حجازى، ناهد رشدى، حمزة العيلى، حسنى شتا، خالد كمال ومن تأليف محمد سيد بشير وإخراج حسام على وإنتاج شركة سينرجى.
 
كما شارك العوضى فى موسم رمضان الماضى في مسلسل "الاختيار" بطولة أمير كرارة ودينا فؤاد وسارة عادل وضياء عبد الخالق وعدد كبير من الفنانين وهم محمد إمام، آسر ياسين، محمد رجب، إياد نصار، كريم محمود عبد العزيز، ماجد المصرى، صلاح عبد الله، كريم عبد الخالق، محمد عز، مها نصار وآخرين وهو من تأليف باهر دويدار، وإخراج بيتر ميمى، وإنتاج شركة سينرجى.
 
 
 
7c841d73-7769-4c08-aedc-cdacc1163bde
 

 

59ee8609-9253-4309-9b9e-827cebcfb836
 

 

798d3892-f7e1-4ce3-91ba-3ed584c71c30
 

 

a85b3c41-71db-4fdb-ab8a-3412f6d25745
 

 

c60f08cf-dbe5-4a68-9e23-4bade3956af5
 

 

e161cf44-7700-4be6-b2d3-1809d4668ab6

 

 

 

اضف تعليق
لا توجد تعليقات على الخبر