قال الفنان عزت العلايلي، كان نفسى أعمل أدوار الشر، بس معملتهوش، لأن التنوع فى الأدوار بيكون حاجة كويسة، وأنا بوافق على الدور بعد اقتناع بالعمل نفسه وإذا كنت مقتنعا بالعمل من الناحية الأدبية والفنية، بوافق وأنفذه فورا سواء طيب أو شرير.
وأضاف خلال ندوة تكريمه فى مهرجان الإسكندرية السينمائى لدول البحر الأبيض المتوسط، هاحكى قصة نزولى للساقية، روحنا بلد اسمها كفر العجايزة، ويوسف شاهين كان جبار وديكتاتورى وقال الساعة ٥ كل الممثلين يكونوا موجودين، وأنا عارف انى هانزل الساقية بقي، فاصطدت راجل فلاح واديته جنيه رشوة عشان أعرف هى غويطة ولا ايه.
وتابع، كنا فى عز الشتا، وانا ابتديت اقلع، لقيته جايلى وبيدينى الجنيه فبقوله ليه، لقيته بيزعق فيا ويقولى إن الماء باردة تماما، وحسيت انه عاوز يدينى بالقلم، واضطريت انزل انا وقتها، بس جالى يوسف شاهين ولقيته بينقط عليا من زجاجة صغيرة طولها ٢ سم فبقوله ايه ده قالى ده مطهر.
يشار إلى أن الفنان عزت العلايلى حاصل على بكالوريوس المعهد العالى للفنون المسرحية عام 1960، وبدأ مشواره الفنى بفيلم "رسالة من امرأة مجهولة" عام 1962 والذى كان أولى خطواته السينمائية، وتعددت أعماله بعد ذلك ليشارك فى عشرات الأعمال ما بين السينما والتلفزيون، وكانت أحد أهم أدواره فيلم "الأرض" عام 1970 إخراج يوسف شاهين، ومن أبرز أعماله "الطريق إلى إيلات، أهل القمة، المنصورية، التوت والنبوت"، وفى المسرح شارك فى عدة مسرحيات من أهمها "أهلا يا بكوات، ثورة قرية"، وكانت آخر أعماله التلفزيونية مسلسل "قيد عائلي" عام 2019.