بهية
وإيدى زى عزيمتى قوية
وبحسنى وسمارى بتباهى
وقلبى
نهر كبير بيفيض حنية
زى النخل
صالبة طولى فى وش الريح
وراسى مرفوعة في العالى
وخيرى على كل الدنيا
والحنة فى كفى بتلالى
وحبوبة وجدعة وعشرية
ووقت الجد
ببقى قوة مالهاش حد
وحصن منيع وأكبر سد
فى وش كل عدو وخسيس
وببقى مدرسة الوطنية
ولما الغمة تروح وتعدى
برجع أبنى
وأزرع وأحصد
وأربى راجل تلو الراجل
يصونوا العرض ويفدوا الأرض
وتفضل بلدى حرة أبية
بهية
وإيدى زى عزيمتى قوية
وبحسنى وسمارى بتباهى
وقلبى
نهر كبير بيفيض حنية
