انتشرت أمس السبت شائعات تزعم زواج المذيعة رضوى الشربينى، من رجل متزوج، وعلى عكس رد فعل رضوى الشربينى فى التعليق على الشائعات، حيث تحاول تجاهلها طوال الوقت، قررت هذه المرة الرد على تلك الشائعة، من خلال لايف على صفحتها بـ"إنستجرام" لتوضح حقيقة الأمر، خاصة أن الشائعة ليست تخصها فقط، حيث قالت رضوى الشربينى: "لقيت إشاعة غريبة جدا ولأنها ما تخصنيش أنا لوحدى طالعة أتكلم، وده للمرة الثانية، وفى المرة الأولى طلع عليا إنى مرتبطة بمواطن مغربى اسماً وقولاً، واتقال إنى هتجوزه، ودلوقتى لسه طالعة من الاستديو بنفس المكياج طلعت إشاعة غريبة، مش عارفة اتقال ليه، أو يمكن عارفة اتقال ليه فى التوقيت ده بالذات".
وبقول للناس اللى بتحبنى وما بتحبنيش أنا شخص مش مرتبط، ولما هرتبط كل الناس هتعرف، علشان أنا مش الست اللى بتعمل حاجة فى الدرا، ومش الست اللى بتعمل حاجة فى الخفا، أنا بجحة كفاية أوى إن أى حاجة أعملها أطلع أقول إنى بعملها؛ لأن الجواز مش عيب وبقول كده فى برنامجى على طول اتجوزوا بس اختاروا صح".
وعن سبب ردها قالت: "طلعت رديت لأنى رد الحق للناس المحترمة واجب، ولأنى لاقيت وأنا جاية فى العربية بعض التعليقات اللى زى ما يكون الناس كانت مستنية أو ما بتصدق، أو أنا مش عارفة.. ليه لما يتقال عليها – الناس اللى بيطلق عليهم مشاهير- حاجة حلوة مش بتتصدق، ولما بيتقال حاجة مش كويسة، بتتصدق وتجرى كده، ربنا يهدى الجميع، ويهدى الشخص اللى فكر يكتب الكلمتين دول، بردو أنا مسامحاك لأنى عارفة أنت عامل كده ليه، وواخد من مين علشان تكتب كده، وحياة ربنا، وربنا ما تصدقوش كل حاجة بتتقال، ما تصدقوش كل إشاعة، ما تصدقوش كل كلمتين، علشان إحنا بنى آدمين، وعندنا أهل وعيال بيضايقوا علينا، وسمعة، إحنا يقال علينا مشاهير، بس بنزعل وعندنا ناس بتزعل عليها، ربنا يهدى الجميع، دول كلمتين طلعت اقولهم فى حق ناس جزمتهم على راسى".
وأنهت كلامها بقولها: "لو رضوى الشربينى بتحب هتقول وهاخد رأيكوا زى ما خدتوا رأيى، زى ما بعمل من 4 أو 5 سنين".