عبر الإعلامى عمرو أديب، عن غضبه من قرار مدرسة "تحيا مصر" بحى الأسمرات بطرد طلاب لعدم الالتزام بالزى المدرسى لعدم قدرة والديه على شراء الزي، وشن هجوما على إدارة المدرسة قائلًا: "هو انتو بتعلموا أوى.. دى مش مدرسة أهلك علشان تطرد حد".
وقال أديب، ببرنامج "كل يوم" المذاع عبر فضائية ON E: "المفروض مفيش عيل يطرد من مدرسة حكومى، والناس دى بتبتدى حياتها فى الأسمرات، والمدارس الحكومية إحنا اللى بندفع فلوسها عشان تتعمل، ومش من حق مديرى المدرسة أو الفصل يعمل كده، وده أقذر حاجة اتعملت والمنظر زبالة".
وأضاف عمرو أديب، إن الدستور المصرى هو من أعطى الحق فى التعليم مجانا، وتابع: "الناس دى مش ناقصة والتعليم حقه وأنت ملتزم إنك تعلمه، ومينفعش العيال ترجع معيطة ومكسورة والمشاهد دى عمرها ما هتتنسى المواقف دى".
ووجه حديثه لوزير التربية والتعليم الدكتور طارق شوقى قائلًا: "بهيب بوزير التربية والتعليم بعدم ترحيل أى طفل من مدرسة لأى سبب كان"، وأشار إلى أن رجل الأعمال محمد المرشدى تبرع بـ 100 ألف جنيه لشراء ملابس لطلاب المدارس حتى لا تتكرر تلك المشاهد مرة أخرى، كما تبرع المحامى سمير صبرى بـ 20 ألف جنيه، وزوجة رجل أعمال رفضت ذكر اسمها، بالتكفل بجميع التكاليف الخاصة بأطفال المدراس كما تبرعت إحدى الشركات بمبلغ 50 ألف جنيه لطلاب المدراس، واستكمل: "أى طالب هيمشوه من المدرسة إحنا جاهزين نجيبله الزي عشان ميمشهوش".