ينشر موقع "عين"، حوارا نادرا للشاعر الغنائى محمد حمزة، خلال لقائه فى أحد البرامج التليفزيونية، ويتحدث حمزة خلال اللقاء عن ذكرياته وأسراره مع العندليب الأسمر عبد الحليم حافظ، قائلاً: "إحنا بعد أغنية سواح بقينا صحاب وأنا كنت مؤلف مبتدئ".
محمد حمزة وعبد الحليم حافظ
وأضاف: "اللى عرّفنى على حليم بليغ حمدى أخويا وحبيبى وأنا ساعتها كنت كاتب أغنية سواح وخدها بليغ سمعها لحليم، قال له "روح هاتلى المؤلف اللى كتب الأغنية دى يكملها عشان عندى حفلة بعد شهر ونص"، وبالفعل روحت وأول ما شفت حليم كأنى أعرفه من زمان وهو عشان يشيل الرهبة من عندى فى أول لقاء قال لى على فكرة الأغنية حلوة ويا ريت تخلص لى الأغنية دى خلال أسبوع ودخل وسابنى وأنا ربنا ألهمنى إنى أكتب الكوبليه وأول ما دخل عليا أنا قلبت الورقة وقال لي قلبت الورقة ليه؟، قلت له لسه ما استقرتش على الكلام، فشافها وقال لى مش هنغير ولا كلمة حلو كده".
واستكمل حمزة حديثه قائلاً: "عبد الحليم ساعدني كتير وخلاني ألف معاه العالم كله أوروبا والدول العربية مفيش بلد مرحتهاش وأنا روحت لندن قبل ما أسافر إسكندرية".
وأوضح: "أنا عندى مكتبة كبيرة فى البيت نصها هو اللى جابهالى، وكان فى فترة من الفترات بيروت كان فيها كل دور النشر بعد النكسة كل ما يروح يجبلي".
