قالت الفنانة هالة صدقى، إن الفيديو الذى نسب إليها بتوجيه ألفاظ خارجة لزملائها الفنانين مفبرك، موضحة: "الفيديو ده صورته إمبارح، وكان الصوت اللى عليه صوت الأشجار والعاملين بالمسلسل معايا، بس أنا لم أتكلم فيه نهائيا، وحتى نشرت فيديو آخر اتكلمت فيه وقلت إننا متذنبين فى البرد عشان مستنيين الشمس تغيب عشان نصور بعض المشاهد".
وأضافت فى تصريح خاص لـ"عين"، اتفاجئت النهاردة بصوت على الفيديو وعليه ألفاظ، وفعلا كان على حسابى على "إنستجرام" فاكتشفت أن شخصا عمل اختراق لحسابى، ونزل الفيديو اللى فيه ألفاظ مسيئة لزملائى.
وتابعت: "أنا نفسى لما سمعت الصوت حسيت إنه صوتى، بس عرفت بعدها إن فى برامج بتقدر تغير الصوت وحصلت كتير قبل كده، وأنا ضعيفة فى التكنولوجيا جدا، ولا عارفة يعنى إيه اختراق، حتى الدليل إنهم ماخدوش فيديو أكون ظاهرة فيه بتكلم عشان حركة الشفايف مش هاتكون منطبقة على الكلام اللى بيتقال".
واختتمت حديثها مؤكدة: "أنا فنانة مش دكتورة، وأنا لو شتمت كده يبقى بشتم نفسى أنا كمان، واللى بيتابعونى يعرفوا إنى دايما بقول إن دول أهلى واخواتى وأصحابى وبدافع عنهم، يبقى إزاى هشتمهم بالطريقة دى، أنا حتى أصحابى مصدقوش الفيديو نهائى لأنهم عارفينى كويس، للأسف إحنا القوة الناعمة سواء مثقفين أو ممثلين أو كتاب بنتحارب من الخارج، ونفسهم فى أى غلطة لينا".
وكان فيديو نشر على حساب الفنانة هالة صدقى عبر حسابها على موقع "إنستجرام"، صورت فيه مجموعة من العاملين من كواليس تصوير مسلسل وتضمن صوتا مشابها لها وتقوم بتوجيه إساءة للعاملين معها بالمسلسل واصفة إياهم بـ"الجرابيع والحثالة".