كثيرا ما نسمع عن صراعات النجوم حول مكان وحجم اسمهم على أفيش الفيلم... وازاى اسمى يتكتب بالبنط ده.. أنا مفروض اسمى يبقى ببنط أكبر وفى مكان أعلى.. من هنا عاوز أسأل سؤال... مين فاكر أفيشات الموسم اللى فات.. ولا حد.. الأفيش بعد أسبوعين تلاتة بيتشال وبيزل مكانه إعلان لمكرونة ولا علبه سمنة.
وفى نفس المكان والحجم على أهم كوبرى من كبارى القاهرة... كل صراعات الأفيش إلى زوال ويبقى تأثير دورك فى العمل الفنى... مشهد واحد لخالد صالح فى فيلم محامى خلع... دفع به إلى مصاف النجوم... ولا أظن أن حجم اسمه على أفيش الفيلم كان بذلك الحجم الملفت الرائع.. والأمثلة لا تعدى ولا تحصى... أستاذنا عبد العظيم عبد الحق ومشهده الرائع فى فيلم الإرهاب والكباب... اسمه على الأفيش كان عامل إزاى.
ولكن أسأل عن تأثيره على المشاهد كان عامل ازاى... لا تشغل بالك أيها النجم بمكان اسمك وحجمه على أفيش فيلم بيتعمل تندة على أى مقهى بعد ان يزال من على فريم الاعلان... ابحث دوما عن تأثيرك داخل أحداث العمل... وعندها فقط ستضع اسمك بالبنط العريض فى قلوب محبيك.